Diese Seite mit anderen teilen ...

Informationen zum Thema:
Forum:
Red Blue Devils Poeten Forum
Beiträge im Thema:
8
Erster Beitrag:
vor 11 Jahren, 8 Monaten
Letzter Beitrag:
vor 11 Jahren, 8 Monaten
Beteiligte Autoren:
atzge, Bahndämmler, Rotblau, Mätzli, Kopfschüttler, grufty, Mayor

Poetehock 2/06

Startbeitrag von Mayor am 06.02.2006 08:27

De Hogg geschter Zoobe hett zwar im glaine, aber nidd minder gmietlichem Rahme im Papa Joe's stattgfunde.

Aawäsend sin gsi: (Uffzellig noch Sitzornig): Dave, Kopfschüttler, Kopfschüttlerin, Beglaiterin vo de Schüttlers, Grufty und no mini wenigkeit.

Themene sin unter anderem Pfyfferli/Mimösli, Guggene, Wääge, Räpplivombodeuffhebeundaakeie,Teschtspiel, Videos Grufty (in Verbindig mit de Sportliche Leitig vom FCB...), d Ex-FCB-Spieler wo jetzt in Froonggreisch sin, Fluugpryys-Politik, Tix für Arsenal, Funktionstüchtigkeit vo de JK bim erschte Spiel im neue Joohr, Natel-Abos, s verschlugge vo Gegeständ, Trambilijee wo au für e Ruckwäg gültig sin (stimmt schyyns gar nidd - isch nur so gsi wenn me vom Baselbiet ko isch...!), s falschi Hoffnige mache vomene "gwüsse" Poet an d Serviertochter, etc. etc....

Gässe worde-n-isch natürlig au no: Vomene Salätli, übere bitzli grösseres Salätli, Knoblauchbrot, Frenchfries, Chicken-Nuggets, Onion-Rings, nomol e Salat, Chicken-Burger, irgend e art vo Käsbrötli, Fisch mit Maiskugele (!?) bis aahne zue Spare-Ribbs! Und denne no e "glai" Dessert...;-)

Y hoff y ha jetzt alli könne gluschtig mache s übernäggschtmol (näggschtmol isch Oobe vor de Fasnacht und do hänn alli fireh ins Bett z goh!!!:D) au widr an Hogg z koh!

Antworten:

Wenn ych das so liis:

Lägg, hänn mir vyyl gschnuurt! Jo guet... hänn jo au Zyt ka, bis die maischte Ässe ko sin... :rolleyes:

Merci fir d'Zämmefassig und vorallem nadyrligg allne Bedailigte firs derbis si. Isch gmietligg und luschtig gsi!



von Kopfschüttler - am 06.02.2006 09:18
Merci fürs Résumé. Bi schlussändlig, dank däm, dass kai Drämmli cho isch, bis an d'Muschtermäss gloffe, was mim volle Buuch numme guet do het ;)



von grufty - am 06.02.2006 10:32
Dr atzge und myni Weenigkait hänn e Poetehogg Ableger in Rom duuregfiehrt. Zue Pizza, Penne und vyyl, vyyl Chianti hämmer live im Beizefärnseh Lazio-Milan yynezooge.

Doorum au nochdräägli unseri Abmäldig und e diggs "sorry" fir dr Originalhogg.



von Mätzli - am 06.02.2006 19:12
I nimm a, ihr hänn welle go AS Rom - FCB luege und sin e biz z'schpoht kho. Wes hat emoll dr Michail Gorbatschov gsayt?



von Rotblau - am 06.02.2006 21:11

Poetehock Abdailig Roma



Rom sehen und sterben- dasch s Motto gsi vo dere Rais, zwor nidd fyr uns aber fyr dye arme Sieche wo in dr Metro und em Tram z nooch bi uns gstande sin, noch emene ussgyybige Moohl an dr Piazza Navona oder im Trastevere. Denn Knoblauchspaghetti verdiene deerte no ihre Name!!!

Spyelt me das ganze mit gnueg Brunello, Amarone und Grappa in richtig Ussgang, kennte Fyynstaubverpuffige z stand koh, wo nidd wirgglig gsund sin.

Nai Rotblau, mir hänn welle go de Naziali zueluege wye si bleed dien, d Temperature, dye obergemaini Bise und e nätte Baizer wo dr Match im TV lauffe loh hett, hänn is denn aber zem Gligg dra ghinderet. S'isch e totale Sch...-Match gsi und so hämmer kenne d Gasvorröt(wo scho langsam zer Naige gange sin), mittels vertilgig vo Bruschetta al Porcini, Spaghetti all'Amatriciana und Pizza Diavola, Chianti und Grappa uffylle.

Rom isch oberaffetittegail, aber dr Ifluss vo de Amis macht sich iberall bemerggbar, denn all'ne Orte kasch lääse das de di jetzte imene amerikanisch dominierte Viertel beweggsch(US C I T A ;-) ).

D'Ägelsburg hämmer haimgsuecht, ebeso s Pantheon, dye spanischi Träppe, d Fontana di Trevi(deerte hämmer e Münze um e FCB Fyyrzyg gläbbt und sy, wye's sich gheert mit dr rächte Hand iber dye linggi Schultere in dä Brunne gspiggt, in dr Hoffnig, das jetzte dr FCB noonemoll derf in Rom aträtte und zaige was er wirgglig ka.....!), dr Vatikan, Piazza del Popolo, Piazza Navona, dr Campo dei Fiori und s Trastevere. Dasch ämmel alles wo mi dra erinnere mag.......

(edit: oke,oke, dr Zirkus Maximus und s Forum Romanum hanni scho mol vrgässe, ebefalls d via Condotti, d via del Corso und dr Palazzo Madama, d Piazza di Torre Argentina, s Monumento a Vittorio Emanuele, dr Juschtizpalascht und i hoff i mues nidd alli Ristorante und Trattorie, Pizzerie und Enotheque namentlig erwähne, sunnscht kumm i nämmlig langsam aber sicher in Saich...)

Mr hänn d Mamme vo aim vo de erschte Roma-Capos kenneglernt und ihre bi dr Ussiebig vo ihrer Arbet zuegluegt. Dasch grad am Egge zem Campo dei Fiori gsi, deert isch si g'sässe und hett dr ganzi Obe in ainere luttsterggi dye dert awäsende agschraue. Nur guet hett ihre Sohn scho e Megaphon gha, sunnscht wär er woohrschyns scho in Pension......

I wär ibrigens drfyyr das mr dr neggscht Poetehogg in Rom wurde duurefiehre, denn s Ässe, d Ambience, d Girls und iberhaupt alles, macht scho e anderi Falle als das in dr Hattriggbar dr Fall isch. Wenn me jetzt no dä Betrag drzuerächnet wo aim dr Källner amme bschisst, wär dr Flug äu scho zahlt.



von atzge - am 07.02.2006 14:39

Re: Poetehock Abdailig Roma

Liebe Atzge

Messi für dä unterhaltsami und vorallem wie allewyl amüsanti Bricht :spos:

Ha mi grad 10 Joor zruggversetzt gfühlt, woni mit minere bessere Hälfti in Rom gsi bi. Rom isch wirklich in allne Belange e tolli Stadt, wo jederzyt e Reisli wärt isch und ich mich immer wieder gärn dra zrugg erinnere.

von Bahndämmler - am 07.02.2006 14:52

Re: Poetehock Abdailig Roma




Thanxx my friend!

Bi jetzte scho gspannt uff di Barçelona-Raisebrycht!



von atzge - am 07.02.2006 15:14
Zur Information:
MySnip.de hat keinen Einfluss auf die Inhalte der Beiträge. Bitte kontaktieren Sie den Administrator des Forums bei Problemen oder Löschforderungen über die Kontaktseite.
Falls die Kontaktaufnahme mit dem Administrator des Forums fehlschlägt, kontaktieren Sie uns bitte über die in unserem Impressum angegebenen Daten.