Diese Seite mit anderen teilen ...

Informationen zum Thema:
Forum:
Red Blue Devils Poeten Forum
Beiträge im Thema:
12
Erster Beitrag:
vor 10 Jahren, 11 Monaten
Letzter Beitrag:
vor 10 Jahren, 11 Monaten
Beteiligte Autoren:
Fanti, Kopfschüttler, Mayor, RKB

OT: hitte Vorverkauf Tattoo-Tix!

Startbeitrag von Fanti am 04.12.2006 08:54

Zer Info (und dermit nochhär kaine kunnt und sait: "Ouhmonneijh, hätt ych doch das numme gwysst!"): hitte am 10:00 GMT resp. 11:00 MEZ fangt dr Online-Vorverkauf fir d Tattoo-Tix 2007 aa. Es isch wie allewyyl: dr Schnäller isch dr Gschwinder... ;-)

[www.edintattoo.co.uk]

Antworten:

Ändlig duurekoo und bschtellt - Slàinte mhath! :D



von Fanti - am 04.12.2006 14:49
Grätuleischon!

D'Kopfschüttlers wärde vermuetligg erscht 2009 wiider am Start si...



von Kopfschüttler - am 05.12.2006 07:55

e ketzerischi froog

eine ketzerische Frage:
was fasziniert euch an diesem anlass? meine schwiegereltern waren auch total begeistert, also habe ich mich dir fernsehübertragung zu gemüte führen wollen. doch nach wenigen minuten (und langem warten auf die ersten dudelsäcke) habe ich den fernseher wieder abgestellt und mich gefragt, was an diesem ereignis so toll ist.

irgendwas tolles muss es ja haben, weil sonst nicht so viele leute begeistert wären. aber was ist es? bin ich einfach zu ungebildet, um das zu verstehen :cool: oder mache ich was falsch?

ernsthafte antworten sind erwünscht, beleidigungen auch. ich brauche das! ;-)



von RKB - am 05.12.2006 08:47

Re: e ketzerischi froog

Es isch s "Gsamt-Päggli" wo's usmacht.
- Eerschtens emool d Stadt wo mir und mynere liebe Frau au bim achte Bsuech saumässig gfalle het, und au näggscht Joor bim nyynte Mool wiird das esoo syy. Ych kaa's irgendwie au nit erklääre aber Du hesch sicher au esoo Oort usser Basel wo Du Di aifach irgendwie dehaime fyhlsch, au wenn zem x-te Mool aanekunnsch.
- Zwaitens d "Esplanade" mit em Schloss als Kulisse - es git aifach kai gailere Oort fir soon e Aaloss als dä, und nadierlig fahrt das vyyl mee yy wenn sälber deert hoggsch als wenn das "numme" am TV gsehsch.
- Drittens dr "Sound" - au mit de beschte Mikrophon uff dääre Wält griegsch es nit aane dass d "Konsärve" glyych deent wie dr Klang vor Oort.

Und denn isch halt vyllicht no e bitzli "Spirituells" im Spiil. Zue däm e glaini Anekdoote: im 2002 isch nääbe mir e nätti "elderly lady" us Edinburgh gsässe. Scho bim Yymarsch vo de Massed Pipes & Drums ha ych gflennt wien e Duubel, und die Daame het sich erkundigt eb's mir au guet gieng. Ych han ere denn gsait dass mi keltischi und im spezielle Duudelsagg-Muusig halt saumässig beriehre wuurd. Wo ych bim "Lone Piper" zem wiederhoolte Mool s Naasduech fyyregnoo ha het die Lady zue mir gsait: "Perhaps you were a Scotsman in a former life." Wär waiss...



von Fanti - am 05.12.2006 09:39

Re: e ketzerischi froog

:-) alles klar!

und wie ist das mit dem basel tattoo. same feelings ?

weil meine schwiegereltern waren da und sind wirklich sehr begeistert....



von RKB - am 05.12.2006 10:00

Re: e ketzerischi froog

...bi nit am Basel Tattoo gsii. Mir hänn us finanzielle Grynd druff verzichtet wil mer jo drei Wuche speeter uff Schottland sinn. E rächte Dail vom Basler Brogramm ha ych scho friehner emool (d Norwääger, d Russe) oder denn im glyyche Joor (Highland Dancers, Top Secret) in Edinburgh gsee. Und Massed Pipes & Drums het's halt uff dr Esplanade ewäng mee als uff em Kasäärnehof... ;-)



von Fanti - am 05.12.2006 10:15

Re: e ketzerischi froog

Daas isch kai ketzerisch, sondern e gueti Froog!

Ych ha aber die glyyche Erkleerigs-Schwierigkaite wie dr Fanti. Ains isch aber sicher: Am TV oder DVD luege oder vor Ort erlääbe sinn riesigi Unterschiid.

Mi Schatz und ych sinn im 1988 s'erscht mool gsi. Aigentligg ehnder per Zuefall. S'Hauptziel isch aifach Scotland per Töff gsi. S'Tattoo hann-ych denn mehr oder weniger aifach ybaut, will ych scho oft guets dryber ghört aa. Grossi Erwartigge hann-ych nidd ka, aifach emolle luege halt. Mir könne-n-ys nidd grad als Fan vo Militärmusige und so bezaichne.

D'Fahrt durch Schottland isch genial gsi und Edinburgh hett denn - obwohl aigentligg total überloffe um die Zyt - e ganz speziells Flair ka. Aifach uffgstellt und yyladend. Und denn das Tattoo: Uns isch schlicht d'Spuggi wägbliibe. Die ganzi Ambiance hett ys schier umghaue! Und bi de Pipes und Drums bisch vor luter Hiehnerhut effektiv gschüttled worde.

Mittlerwiile hänn mer's no fünfmool gseh, es goht ys immer no glyych. Au vo mir e Müschterli derzue: Aimool hänn-mer mi Mamme mitgnoh. Au si kai grossi Ahängerin vo Marschmusig oder ähnliggem. Während em Tattoo hann-ych si moll aglueggt und si isch ganz "glai und still" do gsässe. Ych ha si gfroggt, öb's ihre nidd so gfallt. Denn luegt's mi aa und sait mit ganz fiechte Auge: "Das isch s'schönschte wo-n-ych je gseh ha"! Kasch Dr vorstelle, was fir e Klos denn im Hals spüürsch.

Okay... ganz so "schlimm" ;-) isch es nach dr X-te Vorstellig zwar nümme und gwüssi (vorallem "Dudelsagg-freyi") Byydrääg haue aim villicht nümm zwingend vom Hogger. Aber wenn die Sieche mit ihrne Pipes kömme, isch no immer Hiehnerhut im Übermass garantiert.

Du sehsch, au mir als maischtens doch zimligg rationell dänggende Mensch, fallt's schwer, das z'erkleere.

Am Basel-Tattoo bin ych - wie au scho an de baide Yyshalle-Tattos - au gsi. Es hett mer gfalle und s'Tattoo vor dr Kasärne isch solid gmacht. Bösi Zunge würde saage: Guet abglueggt. Die glyych Ambiance wie z'Schottland wird me nidd anebikoh, aber es könnt sich öbbis sehr guets druss entwiggle! Im Momänt kasch's villicht e so verglyyche:

S'Edinburgh Tattoo isch e wunderschöni Frau, s'Basel Tatto die härzigg, aber noonig volljährig glaini Schwöschter! :D



von Kopfschüttler - am 05.12.2006 14:57

a propos Edinburgh

Do no e Filmli won ych mitm Natel bi mim Bsuech gmacht ha:

[www.youtube.com]



von Mayor - am 05.12.2006 15:47

Re: a propos Edinburgh

Hey Monn! I waiss, wo Di Piper stoht, Monn! ;-)



von Kopfschüttler - am 05.12.2006 16:56

Re: a propos Edinburgh

Y waiss! Das hett mr jetzt no e Jede gsait wo schomol in Edinburgh gsi isch...:-)



von Mayor - am 06.12.2006 08:03

Re: a propos Edinburgh

Daas ka-mer vorstelle! :D Wenn an dämm Egge nidd mind. 1x verbii kunnsch, bisch nidd z'Edinburgh gsi...



von Kopfschüttler - am 06.12.2006 09:21
Zur Information:
MySnip.de hat keinen Einfluss auf die Inhalte der Beiträge. Bitte kontaktieren Sie den Administrator des Forums bei Problemen oder Löschforderungen über die Kontaktseite.
Falls die Kontaktaufnahme mit dem Administrator des Forums fehlschlägt, kontaktieren Sie uns bitte über die in unserem Impressum angegebenen Daten.