Diese Seite mit anderen teilen ...

Informationen zum Thema:
Forum:
Red Blue Devils Poeten Forum
Beiträge im Thema:
11
Erster Beitrag:
vor 10 Jahren, 11 Monaten
Letzter Beitrag:
vor 10 Jahren, 11 Monaten
Beteiligte Autoren:
Mätzli, Fanti, Rotblau, Latteknaller, luki77, Goofy, Kopfschüttler

Es isch jo 6. Dezämber, doorum...

Startbeitrag von Fanti am 06.12.2006 15:10

Santiglaus, Du liebe Maa
Bring mer doch e Abwehrmaa
Und zwor ain fir hinde rächts
Wäär verglemmi gar nyt schlächts
Denn um unsre Reto Zanni
Kuurvt wie amme s Wenzel Hanni
Slalomsstangegwäädlet isch
Dr Gäägnersturm was hesch was gisch.

Au hinde linggs kennt's aine bruuche
Dermit's dr Scotty nimm duet schluuche
Statt sy "mifdield" kenne gniesse
Nur Defensives laischte z miesse
Wie wär's denn dr Atouba z hoole?
Dr Stammblatz hänn si däm jo gstohle
Bim krisegschyttlet HSV
(2. Liga bald, helau!).

Unser Mittelfäld het Mieh
S fählt ain wo d Fääde als kaa zieh
Drum Nigginäggi, heb doch Ghöhr
Und schängg ys schnäll e Reschissöhr
S muess jo nit grad e Deco syy
(dä hätt zwar d Faarbe scho derbyy...)
Aifach ain mit "letschtem Pass"
Denn mache mer Zi!rü wieder nass.

Und denn isch halt au im Stuurm
E biirebitzeli dr Wuurm
Wenn dr Petric 'mol nit dopft
Isch dr Kaschte wie verstopft
Dr Cristiano isch e Flop
Dr César nur bim Doggter "top"
Dr Stereo e Wundergugge
Duet ab und zue ain yynedrugge
Dr Eduardo kaa zwor wiehle
Doch sy Quote isch zem Briehle
Und zue all däm Ybel aane
Deerft dr Petric s Usland blaane
Spiilt er guet hänn mir dr Drägg
Und dr Zähner isch ewägg
Santiglaus, ych wuurd drum maine
Mir bruuche au no voorne aine!

Merci!

Antworten:

Santiglaus, Du liebe Maa,
ych mecht hytt gar kai Päggli ha.

Im Gegedail - jetzt wirdsch no stuune,
daasmool derfsch DU ebbis verruume

Pagg doch in dä grossi Sagg
aifach yy das Zircher Pagg.

Ych waiss zwar jetzt grad nidd genau
- waisch, Zircher sinn halt nidd so schlau -

eb's längt, dass Si Dir d'Riebli schelle,
oder nur dr ganz Daag Mischt verzelle

Sunscht nimmsch si halt denn in dr Not
als Esel-Ersatz, ych glaub daas goht!


Dangscheen Santiglaus! :D



von Kopfschüttler - am 06.12.2006 15:46
absoult dr hammer !



von Latteknaller - am 06.12.2006 16:23
:D



von Latteknaller - am 06.12.2006 17:09
E guete Värs, i hoff d'Antirassismus-Ufspürer finde di Teggscht nit.



von Rotblau - am 06.12.2006 17:47
Dr Fanti dä kha guet dichte
Aber ebbis hetr vrgässe z'brichte
Dr Santiglaus mit Bart wiss wiä Schee
Sell e ganz e grosse Sagg mitneh
Dr Sagg isch tarnt als FCB-Jagge
Denn duet är dr Drehner Gross ypagge



von Rotblau - am 06.12.2006 18:04
Dä ka no so lang schnüffle, do dr Ziircher no immer kai aigeni Rasse darstellt, allerheggschtens e Zuemuetig ;)



von Goofy - am 06.12.2006 20:28
Dr fanti dichtet magistral
e Värsli allererschter Wahl
Nur kaimt in mir jetzt dr Verdacht,
as är die Värsli numme macht
will är als Chippy Fan als grosse
au no zem FCB mecht stosse

Denn au är hett derfe heere
vom atzge synere Karriere
wo als Poet mit tolle Zyyle
uf dr Gschäftstell darf verwyyle.

Doch wär mit HEARTS top in dr MK stoht
me sälte fir dä Job vorschloht. :D



von Mätzli - am 07.12.2006 08:05
Mätzli, loos, Du liebe Maa
Ha wieder s Basler Käppi aa
Und stand derzue nääbe mym Wyybli
Im 26-er Scotty-Liibli. ;-)



von Fanti - am 07.12.2006 08:47
Y waiss, y waiss

Aber in dr Not um d'Pointe, frisst dr armi Deyfel Fliege! ;-)



von Mätzli - am 07.12.2006 09:15
Y due di als würdig verträtte, zumindest was s trage vo me Hearts-Käppi aa goht... ;)



von luki77 - am 07.12.2006 11:21
Zur Information:
MySnip.de hat keinen Einfluss auf die Inhalte der Beiträge. Bitte kontaktieren Sie den Administrator des Forums bei Problemen oder Löschforderungen über die Kontaktseite.
Falls die Kontaktaufnahme mit dem Administrator des Forums fehlschlägt, kontaktieren Sie uns bitte über die in unserem Impressum angegebenen Daten.