Diese Seite mit anderen teilen ...

Informationen zum Thema:
Forum:
Red Blue Devils Poeten Forum
Beiträge im Thema:
4
Erster Beitrag:
vor 10 Monaten, 2 Wochen
Letzter Beitrag:
vor 10 Monaten, 1 Woche
Beteiligte Autoren:
Mätzli, Don Daniel, Kopfschüttler, Fanti

CL-Résüméé

Startbeitrag von Fanti am 07.12.2016 07:33

Im eerschte Match gääge d Bulgaare
Erwaartet me e Sieg, e klaare
Doch Bossl schuttet zimlig schwach
Und erraicht mit Ach und Grach
Grad emool e Ains ze Ains
Das isch e Dämpferli, e glains

In London bi de Tommies ääne
Verdruggt dr Schüttler mängi Drääne
Är waiss nit wäm er hälfe sell
Eb Basel oder Arsenell
Bisch Fan vo baide isch's fataal
Drumm isch's ZwaiNull iim egaal.

Wääge de Franzoose-Deppe
Deerfsch nit vyyl Fans ins Stadion schleppe
Die weenige wo's deerfe gseh
Erlääben e guete FCB
Doch zemänd isch's laider so:
Mir raise ooni Pinggt dervoo…

Im Ruggspiil im St. Jakob-Park
Spiilt PSG denn zimlig stargg
Doch dangg ere Zuffi-Boogelampe
Kennt e Punggt me uusedrampe
Doch laider ischs's nyt mit däm Gnuss
Wääge 'me Meunier-Sunntigsschuss

So isch's klar denn, nundefaane
In Sofia muess e Sieg jetz aane
Doch Fischer's Fritze will's nit glinge
Rasgrad in Bedrängnis z bringe
So hoole die dr Punggt wo's bruucht
Und Basel isch fruschtriert und gschluucht.

Im letschte Spiil am Glausedaag
Bassiert uns das wo kaine maag
Me wird vo Ars'nal deklassiert
Und uns wird vor Auge gfiehrt
Mit dääre Mannschaft und däm Scheff
Isch d CL z grooss fir uns, ganz bref.

Antworten:

Scheen zämmegfasst, drumm vyyle Dangg!
Du gheersch in d Stammelf, nidd uff d Bangg.

Nur ains möcht ych schon no betoone
au wenn s zum Reime sich duet lohne:

Nüdd isch mit Kopfschüttler-Drääne
do muess ych sunneklaar erwäähne:

S Härz schloht rot-blau in jedem Match
wär anders sait, verzellt e Quatsch!

Wenn är denn rollt dr CL-Ball:
HOPP FCB, nidd Arsenal!

Au wenn - sovvyl gib ych jo zue
daas schnäller ych verkrafte due

wenns gege die - wie geschter gscheh
e Niiderlag fir uns muess geh.

von Kopfschüttler - am 07.12.2016 09:14
Danke euch zwei, grosses Kino :))

von Don Daniel - am 07.12.2016 17:05
Es isch halt wohr, vo alters här
Grossi Siig, die wärde schwär,
wenn 's Tafelsilber me verkauft
und maint, dass es so wyterlauft
Mit Gingger us dr Sahelzoone
(wo sich drzue no mängmool schone)

Mit Northmen, wo me seht als Gwinn
doch noh dr EM duure sinn
mit Talänt uss vyyle Lande,
(frey vo Talänt zwor offegstande),
wo s Kader nid so sehr verstergge
(Nur laider duet me 's spoot erscht mergge)

Bref: d'Diamante sinn halt wägg
was blybt erfillt deheim dr Zwägg
Doch im Konzärt vo de ganz Grosse
Muess es dr FCB verbloose
Denn darf me sich nid wundere
wenn flach me abschliesst wie n e Flundere

von Mätzli - am 09.12.2016 01:10
Zur Information:
MySnip.de hat keinen Einfluss auf die Inhalte der Beiträge. Bitte kontaktieren Sie den Administrator des Forums bei Problemen oder Löschforderungen über die Kontaktseite.
Falls die Kontaktaufnahme mit dem Administrator des Forums fehlschlägt, kontaktieren Sie uns bitte über die in unserem Impressum angegebenen Daten.